काठमाडौं। ‘फिफा विश्वकप २०२२’ तथा ‘एसिया कप २०२३’ छनोट अन्तर्गत आज नेपालले चाइनिज ताइपेइसँग कुवेतको ‘जबर अल- हमद अन्तराष्ट्रिय रंगशाला’मा प्रतिस्पर्धा गर्दैछ। यो खेल नेपाली समय अनुसार राति ९:४५ बजे शुरु हुनेछ। नेपाली टोली इराकमा मैत्रीपूर्ण खेल खेलेर कुवेत पुगेको हो । शनिबार भएको खेलमा नेपाल इराकसँग ६–२ गोलले पराजित भएको थियो । इराक र कुवेतको वातावरण उस्तै रहेकाले नेपाललाई केही सहज हुन सक्नेछ ।
आज हामी दुई बर्ष अगाडि नेपालले ताइपेईबिरुद्ध हासिल गरेको शानदार जितको चर्चा गर्दैछौ । तारिख १९ सेप्टेम्बर २०१९ मंगलबार नेपाल भन्दा तुलनात्मकरुपमा बलियो मानिएको चाइनिज ताइपेइविरुद्ध नेपाल मैदानमा उत्रिएको थियो । चाइनिज ताइपेइकै मुन्सिपाल स्टेडियममा भएको खेलमा नेपालले शानदार जित हासिल गरेको थियो । नेपाली टिमको कमाण्ड सम्हालेका योहान कालिनले पहिलो जित आत्मसाथ गर्दा नयाँ कप्तान किरण चेम्जोङले पनि पहिलो नै जित हात पारेका थिए ।
नेपालका लागि अञ्जन विष्टले खेलको तेस्रो मिनेटमा नै गोल गर्न सफल भए । ताइपेईको डिफेन्सको कमजोरीको फाइदा उठाउँदै पहिलो गोल गरेका थिए । खेलको सुरुवातमा नै गोल खाएको ताइपेइले खेलमा फर्कन निकै प्रयास गरे पनि बारम्बार नेपाली खेलाडीहरु बाधक बने । २२ औं मिनेटमा ताइपेइको प्रहारलाई गोलकिपर किरण चेम्जोङले बचाएका थिए ।
त्यसपछि ४१ औं मिनेटमा फेरी ताइपेईको शसक्त प्रहारलाई नेपाली गोलकिपर किरणले नै रोकेका थिए । लगातार नेपाली पोस्टमा ‘मुभ’ बनाएको ताइपेईले ४३ औं मिनेटमा डिबक्सबाट गोल गर्ने अबसर पाएको थियो । तर प्रहार पोष्ट बाहिरिए पछि नेपालसँग पहिलो हाफमा बराबरी गर्ने अबसर ताइपेईले गुमाउन पुग्यो ।
४४ औं मिनेटमा नेपालका रवी पासवानको प्रहार पनि ताइपेईको पोष्ट नजिकैबाट बाहिरीएको थियो । काउन्टरमा ताईपेईको प्रयासमा नेपालको डिफेन्सले ब्लक गरेको थियो ।पहिलो हाफमा एक गोलले पछाडि परेको ताइपेई दोस्रो हाफमा पनि आक्रामक खेल्दा नेपाल भने डिफेन्सिभ देखिएको थियो । तर त्यो डिफेन्सिभ लाइन अप भने नेपालले धेरै बेर निरन्तरता भने दिएन । ताइपेईले पाएको ५२ औं मिनेटको मौकालाई नेपाली डिफेन्स लाइनले क्लियर गरेको थियो ।
यसका साथै ५४ औं मिनेटमा ताईपेईको उत्कृष्ट फ्रिकिकलाई नेपालको डिफेन्सले नै बचाएको थियो । दोस्रो हाफमा अधिकांश समय नेपाली पोस्ट वरिपरि बल घुमे पनि जालि भने चुमाउन ताइपेई असफल भएको थियो । मंगलबारको खेलमा किरण चेम्जोङले पनि उत्कृष्ट प्रदर्शन गरे । नेपाली टिमको कप्तानी समेत गरिहेका किरणले ताइवानको प्राय प्रहारलाई असफल बनाएका थिए ।
खेलको ६२ औं मिनेटमा नेपालले दोस्रो गोल थपेको थियो । नेपालका लागि फेरि पनि अञ्जनले गोल गर्न सफल भए । उनले डिबक्स भित्र अनमार्क रहेको फाइदा उठाउँदै गोल गरेका थिए । ६८ औं मिनेटमा नेपालले फेरी अर्को मौका पाएपनि रवी पासवानले बल कन्ट्रोल भने गर्न सकेनन् । ७२ औं मिनेटमा ताइपेईले फेरि पाएको गोलको अवसरमा उसका कप्तान असफल बने । ७६ औं मिनेटमा नेपालका लागि विमल घर्तिमगरको प्रहारलाई ताईपेईका गोलकिपरले बचाए । ८६ औं मिनेटमा नेपालले अर्को आक्रामणको अवसर बनाए पनि विमल असफल भए ।
