काठमाडौं, असार १९ : फिफा वरीयताको नम्बर वान टिम बेल्जियमलाई पराजित गर्दै इटली युरोकपको सेमिफाइनलमा प्रवेश गरेको छ । जर्मनीको एलिनाज स्टेडियममा शुक्रबार राति भएको क्वाटरफाइनलको दोस्रो खेलमा बेल्जियमलाई २–१ गोल अन्तरले हराउँदै इटालीले सेमिफाइनलमा स्थान बनाएको हो ।
निकै प्रतिस्पर्धात्मक रहेको खेलमा दुबै टिमले उच्च स्तरको प्रदर्शन गरेका थिए । बेल्जियमका तीनजना खेलाडीलाई डिबक्सभित्रै छक्याउँदै निकोलो बरेल्लाले गरेको प्रहारले खेलेको ३१ औं मिनेटमा जाली चुमेको थियो । ४४ औँ मिनेटमा लोरेन्जो इन्सिन्गेले गोल गर्दै इटालीको अग्रता दोब्बर पारे ।
पहिलो हाफको इन्ज्युरी समयमा बल्जियमले पेनाल्टी पायो । बेल्जियमका लागि रोमेलु लुकाकुले गोल फर्काउपनि टिमको हार भने टार्न सकेनन् । डि लोरेन्जोले बेल्जियमका डोकुलाई तानेपछि भिएआरमार्फत पेनाल्टी दिइएको थियो।
अब फाइनल प्रवेशका लागि इटालीले आगामी मंगलबार स्पेनसँग प्रतिस्पर्धा गर्नेछ। यसअघि स्पेनले स्विट्जरल्यान्डलाई पेनाल्टी सुटआउटमा पराजित गर्दै अन्तिम चारमा स्थान बनाएको थियो।