काठमाडौं : स्पेनिस लिग ला लिगा अन्तर्गत आज हुने सिजनको पहिलो खेलमा रियल म्याड्रिडले डिपोर्टिभो आल्भेसको सामना गर्दैछ । इस्टेडियो मेन्डिजोरोजामा हुने खेल नेपाली समय अनुसार राति १ः४५ बजे शुरु हुनेछ ।
आज हुने खेल जित्दै रियल म्याड्रिड सिजनको उत्कृष्ट शुरुवातको खोजीमा रहेको छ । गत सिजन अन्तिम दिनमा लिग गुमाएको म्याड्रिड दोस्रो स्थानमा रहेर ला लिगाको अन्त्य गरेको थियो । गत सिजन लिगको मात्र चार खेलमा हार बेहोरेपनि म्याड्रिड शिर्ष स्थानको एथ्लेटिको भन्दा २ अङ्कले पछि परेको थियो ।
जिनेदिन जिदानले क्लब छोडेपछि कार्लो एन्सेलोट्टी दोस्रो कार्यकालको लागि म्याड्रिड फर्किएका छन् । यसअघि सन् २०१३ देखि २०१५ सम्म रियलको मुख्य प्रशिक्षकको जिम्मेवारी समालेका एन्सेलोट्टीले टोलीलाई कोपा डेल रे, च्याम्पियन्स लिग, युईएफए सुपर कप र क्लब विश्वकपको उपाधि जिताएका थिए ।
