काठमाडौं : आईसीसी विश्वकप क्रिकेट लिग–२ अन्तर्गत नेपाल, ओमान र अमेरिकासँगको त्रिकोणात्मक एक दिवसीय श्रृङ्खलाको खेल तालिका सार्वजनिक भएको छ । सिरिज अघि नेपालले पपुवा न्युगिनी (पीएनजी) सँग दुई एकदिवसीय खेल खेल्नेछ । खेल सेप्टेम्बर ५ र ८ (भदौ २० र २३) मा हुने छन् ।
त्रिकोणात्मक सिरिजमा नेपालले पहिलो खेल अमेरिकासँग आउँदो २८ गते प्रतिस्पर्धा गर्नेछ । यस्तै नेपालले दोस्रो खेलमा ओमानसँग आउँदो २९ गते खेल्ने छ । नेपालले तेस्रो खेलमा अमेरिकासँग असोज १ गते खेल्ने छ भने अन्तिम खेलमा ओमानसँग असोज ३ गते खेल्नेछ ।
यस अघि लिग–२ अन्तर्गत नेपालले घरेलु मैदानमा ओमान र अमेरिकासँग ४ खेल खेलिसकेको छ । जसमा नेपालले अमेरिकालाई दुई खेलमा हराएको थियो भने ओमानसँग दुबै खेलमा पराजित भएको थियो । लिगमा नेपालले ४ खेलमा ४ अंक जोडेको छ । नेपाल छैटौं स्थानमा रहेको छ । ओमान १० खेलमा १६ अंक जोडेर शीर्ष स्थानमा रहेको छ । १२ खेलमा १२ अंक जोडेको अमेरिका दोस्रो स्थानमा रहेको छ ।
नेपालसहित, ओमान, स्कटल्यान्ड, नामिबिया, अमेरिका, पपुवा न्युगिनी र यूएई गरी ७ टोलीले २०२३ सम्म ३६ ओडीआई खेल खेल्नेछन्। शीर्ष तीन टोली सन् २०२३ मा भारतमा हुने एक दिवसीय विश्वकपका लागि सोझै छानिनेछन्। पुछारका चार टोलीले प्लेअफ खेल्नेछन्।
खेल तालिका
भदौ २० : नेपालविरुद्ध पीएनजी पहिलो ओडीआई, दिउँसो ११ः१५ बजे
भदौ २३ : नेपालविरुद्ध पीएनजी पहिलो ओडीआई, दिउँसो ४:१५ बजे
भदौ २८ : नेपालविरुद्ध अमेरिका, दिउँसो ४:१५
भदौ २९ : नेपालविरुद्ध ओमान, दिउँसो ४:१५
असाेज १ : नेपालविरुद्ध अमेरिका, दिउँसो ४:१५
असोज ३ : नेपालविरुद्ध ओमान, दिउँसो ४:१५
यस्तो छ नेपाली टिम : ज्ञानेन्द्र मल्ल (कप्तान), दीपेन्द्र सिंह ऐरि (उप-कप्तान), आसिफ सेख, कुशल मल्ल, सोमपाल कामी, अविनाश बोहरा, शरद भेषवाकर, गुलशन झा, विनोद भण्डारी, सन्दीप लामिछाने, रोहित पौडेल, विक्रम सोव, कुशल भुर्तेल, आरिफ सेख, करण केसी, पवन सराफ, सुशन भारी
