काठमाडौं । सेनेगलले भर्खरै पहिलोपटक अफ्रिका कप अफ नेसन्सको उपाधि जितेको छ । त्यो पनि सर्वाधिक सफल टोली इजिप्टलाई पेनाल्टी सुटआउटमा ४-२ ले हराएर । प्रतियोगिताको सर्वोकृष्ट खेलाडी तथा कप्तान सादियो मानेले सेनेगललाई उपाधि दिलाउन निर्णायक पेनाल्टी प्रहार गरेका थिए । मानेको यो गोल किन विशेष छ भने उनले खेल अवधिमै पाएको पेनाल्टीलाई सदुपयोग गर्न सकेका थिएनन् ।
सेनेगलले सन् २००२ र सन् २०२१ मा उपविजेतामै चित्त बुझाउनु परेको थियो । इंग्लिस क्लब लिभरपुलका फरवार्ड माने भन्छन्, ‘फाइनल जितेको दिन मेरो जीवनकै सबैभन्दा खुसीको क्षण थियो । मैले लिभरपुलका लागि इंग्लिस प्रिमियर लिग र युईएफए च्याम्पियन्स लिग जितेको छु । तर, आजको उपाधि विशेष छ । त्यसैले म धेरै खुसी छु । यो खुसी मेरो मात्र नभएर मेरो परिवार र सेनेगली जनताको पनि हो ।’
माने जितको श्रेय आफ्नो टोलीलाई दिन्छन् । ‘जब मैले पहिलो पेनाल्टी मिस गरेँ, त्यो मेरा लागि निकै ठुलो धक्का थियो । त्यति बेला साथीहरू आएर भनेका थिए- हामी हारे पनि सँगै हार्छौँ र जिते पनि सँगै जित्छौँ । हामीलाई थाहा छ तिमीले टोलीलाई यहाँसम्म ल्याउन धेरै गरेका छौ । यसलाई जारी राख’, मानेले भने ।
‘यसले मलाई बलियो बनायो र मलाई लाग्छ दोस्रोपटक पेनाल्टी प्रहार गर्दा काम गर्याे । साथीहरूकाे कारणले जित हासिल भयाे । सेनेगेली टोलीका सम्पूर्ण सदस्य यो ट्रफीको हकदार छन्’, उनले थपे । टोलीले उपाधि जितेपछि खुसीयाली मनाउन राजधानी डकारमा हजारौँ जनता सडकमा ओर्लेका थिए । उपाधि विजेता टोलीलाई सोमबार भब्य स्वागत गरिएको थियो । सेनेगली सरकारले पनि टोलीले चुमेको सफलतामा खुसीयाली मनाउन सोमबार राष्ट्रिय विदाको घोषणा समेत गरेको थियो ।
