काठमाडौं। सेडियो मानेले इङ्लिस प्रिमियर लिग क्लब लिभरपुल छाडेका छन्। जर्मन बुन्डेस लिगा क्लब बायर्न म्युनिखले मानेलाई ३५ मिलियन पाउन्डमा आबद्ध गरेको छ। बायर्न र मानेबीच तीन वर्षका लागि सम्झौता भएको बीबीसीले जनाएको छ। लिभरपुल र मानेबीच आगामी समरसम्मका लागि सम्झौता रहेको थियो।
माने सन् २०१६ मा ३४ मिलियन पाउन्डमा साउथह्याम्पटनबाट लिभरपुलमा आबद्ध भएका थिए। सेनेगलका यी ३० वर्षीय स्ट्राइकरले लिभरपुलका लागि २ सय ६९ खेलमा एक सय २० गोल गरेका छन्। लिभरपुल युरोपियन च्याम्पियन्स लिगमा एकपटक विजेता र दुईपटक उपविजेता हुँदा माने टोलीका महत्वपूर्ण सदस्य रहेका थिए।
उनले गत सिजन क्लबका लागि सबै प्रतियोगितामा गरेर २३ गोल गरेका थिए। ‘सेडियो माने वर्ल्ड स्टार हुन् र उनले बायर्नको प्रस्ताव स्विकार गरेका छन्। यसले समग्र बुन्डेस लिगाको आकर्षण बढाएको छ’, बायर्न म्युनिखका अध्यक्ष हर्बट हैनरले भनेका छन् ।