Categories
फुटबल

डी बोअर नेदरल्यान्डको मुख्य प्रशिक्षक नियुक्त

काठमाडौं। आयाक्सका पूर्व प्रशिक्षक फ्रान्क डी बोअर नेदरल्यान्ड राष्ट्रिय टीमको मुख्य प्रशिक्षकमा नियुक्त भएका छन्। ५० वर्षे डी बोअर दुई वर्षका लागि नियुक्त भएका हुन्। यससँगै नेदरल्यान्डले कतारमा हुने २०२२ को विश्वकप डी बोअरकै प्रशिक्षणमा खेल्नेछ।

आयाक्स तथा बार्सिलोनाका पूर्व रक्षक डी बोअरले नेदरल्यान्डबाट ११२ खेल खेलेका छन्। रोनाल्ड कोम्यान बार्सिलोनाको प्रशिक्षण सम्हाल्न गएपछि रिक्त स्थान डी बोअरले लिएका हुन्। डी बोअरले २०१८ मा मेजर लिग सकरको एटलान्टा युनाइटेड जानुअघि इन्टर मिलान र क्रिष्टल प्यालेसमा पनि छोटो समय प्रशिक्षण सम्हालेका थिए।

२०१० को विश्वकपमा नेदरल्यान्डले फाइनलसम्मको यात्रा तय गर्दा डी बोअरले सहायक प्रशिक्षकका रूपमा काम गरेका थिए। उनको प्रशिक्षणमा आयाक्सले चारपटक लिग उपाधि जितेको छ। उनले २०१० देखि २०१६ सम्म आयाक्सको प्रशिक्षण सम्हालेका थिए।

डी बोअरको प्रशिक्षणमा नेदरल्यान्डले पहिलो खेल ७ अक्टोबरमा मेक्सिकोविरुद्ध मैत्रीपूर्ण खेल खेल्नेछ। त्यसपछि नेदरल्यान्डले नेसन्स लिगमा अक्टोबर ११ मा बोस्निया हर्जगोबिना र १४ अक्टोबरमा इटालीविरुद्ध खेल्नेछ।

Categories
फुटबल

बार्सिलोनाले सुआरेजलाई बेच्ने सहमति

मेड्रिड, (एजेन्सी) स्पेनी ला लिगा महारथी बार्सिलोनाले स्ट्राइकर लुइस सुआरेजलाई ला लिगाकै क्लब एटलेटीको मेड्रिडमा बेच्ने सहमति गरेको छ। सुआरेज बार्सिलोनामा बस्न नचाहेकोमा क्याटालानहरू उनलाई क्लबबाट छुट्टी गर्न खुसी भएको जनाएको छ। उरुग्वेका स्ट्राइकरले एटलेटीकोसँग तलब कटौती गर्न राजी भएकाले उनी बार्सिलोनाबाट मुक्त हुन पाएका हुन्।

यसअघि सुआरेज इटालिय सिरी ए विजेता युभेन्ट्समा जाने कुरा चलेको थियो। तर, पासपोर्टको समस्याले गर्दा उनी स्पेनबाट अन्त जान पाएका थिएनन््। बार्सिलोनाका अध्यक्ष जोसेप मारिया बार्टोेमेउले उनको सम्झौतामा बाधा तुल्याएका थिए। उनी सुआरेजलाई स्पेनकै क्लबमा बेच्न चाहेका थिएनन्। तर, सुआरेजका प्रतिनिधिसँग छलफल गरेपछि बार्सिलोनाले उनलाई छाड्न सहमति भएको हो।

एटलेटीकोले ३३ वर्षीय सुआरेजलाई ४ मिलियन युरोभन्दा बढी नतिर्ने पनि स्रोतले जनाएको छ। सुआरेजले ३० मिलियन युरोभन्दा आधा रकम मात्रै वर्षमा आम्दानी गर्नेछन्। योसँगै उनको बार्सिलोनासँगको ६ वर्षको करियर अन्त्य भएको छ। उनले सो टोलीका लागि २ सय ८३ खेल खेलेर १ सय ९८ गोल गरेका छन्। साथै, बार्सिलोनाका तीन सुपर स्टार लियोनल मेसी, नेयमार र सुआरेजमा अब मेसी मात्रै एक्लो भएका छन्।

सुआरेज सन् २०१४ मा लिभरपुलबाट ७४ मिलियन पाउन्डमा बार्सिलोनामा आबद्ध भएका थिए। उनको सहयोगमा बार्सिलोनाले ४ ला लिगा, ४ कोपा डेल रेज, च्याम्पियन्स लिग क्लब र वल्र्ड कप जितेको छ।