काठमाडौं । साविक विजेता वेस्ट इन्डिजले आईसीसी टीट्वेन्टी विश्वकप क्रिकेटमा लगातार दोस्रो हार बेहोरेको छ। दुबईमा मंगलबार भएको खेलमा साविक विजेता वेस्ट इन्डिजलाई ८ विकेटले पराजित गर्दै दक्षिण अफ्रीकाले पहिलो जित निकालेको हो । पहिलो खेलमा दक्षिण अफ्रिका अष्ट्रेलियासँग ५ विकेटले पराजित भएको थियो ।
वेस्टइन्डिजले दिएको १४४ रनको लक्ष्य पछाएको दक्षिण अफ्रीकाले १८.२ ओभरमा २ विकेट गुमाउदै लक्ष्य पुरा गरेको थियो । दक्षिण अफ्रिकाका अइडिन मार्कमले अर्धशतकीय पालि खेलेका थिए। आक्रामक ब्याटिङ गरेका उनले २६ बलमा चार छक्का र दुई चौकाको मद्दतमा ५१ रन बनाए। यसैगरी रसी भान डेर डुसेनले ४३ र रिजा हेन्डरिक्सले ३९ रनको योगदान दिए। वेस्ट इन्डिजका अकिल हुसेनले एक विकेट लिएका थिए।
यसअघि टस हारेर पहिला ब्याटिंग गरेको वेस्टइन्डिजले २० ओभरमा ८ विकेट गुमाउदै १४३ रन बनाएको थियो । वेस्टइन्डिजका काइरन पोलार्डले २६ रनको योगदान गरे । लेन्डी सिमोन्सले १६ रन बनाउँदा क्रिस गेलले १२ रनको योगदान गरे ।
दक्षिण अफ्रिकाका ड्वेन प्रिटोरियसले तीन विकेट लिए। यसैगरी केशव महाराजले दुई तथा कागिसो रबाडा र एन्रिज नोर्टजेले एक-एक विकेट हात पारे। जितसँगै दक्षिण अफ्रिकाले महत्वपूर्ण दुई अंक पनि जोडेको छ। समूह एकमा रहेको दक्षिण अफ्रिकाले अब श्रीलंकाको सामना गर्नेछ। वेस्ट इन्डिजले भने बंगलादेशसँग खेल्नेछ।
