दुबई : जर्मन क्लब बार्यन म्युनिख तथा पोल्यान्डका फरवार्ड रोवर्ट लेवान्डोस्कीले एकसाथ दुई अवार्ड जितेका छन् । सोमबार राति दुबईमा आयोजित ‘ग्लोब सकर अवार्ड’ समारोहमा उनलाई वर्षको सर्वोत्कृष्ट फ्यान भोटिङ प्लेयर र वर्षको सर्वोत्कृष्ट गोलकर्ता गरी एकसाथ दुई अवार्डले सम्मानित गरिएको हो । यस वर्षको बालोन डी ओर अवार्डमा दोस्रो बनेका उनले त्यहाँ ‘टप स्कोरर अफ् द इयर फर २०२१’ र ‘म्याराडोना अवार्ड फर बेस्ट गोल स्कोरर २०२१’ गरी दुई अवार्ड जिते । ग्लोब सकर अवार्ड युरोपियन क्लब एसोसिएसनले हरेक वर्ष प्रदान गर्ने अवार्ड हो ।
२०२१ मा सर्वाधिक गोल गरेका आधारमा पोल्यान्डका ३२ वर्षीय फरवार्डलाई ‘म्याराडोना बेस्ट गोल स्कोरर अवार्ड’ प्रदान गरियो भने फ्यानको भोटिङका आधारमा पनि उनलाई वर्षको उत्कृष्ट खेलाडीको अवार्ड पनि प्रदान गरिएको छ । यो अवार्डको नाम ‘द टिकटक फ्यान्स प्लेयर अफ् द इयर अवार्ड’ हो । यो अवार्ड फ्यानको भोटिङका आधारमा निर्णय गरिन्छ ।
फ्यान भोटिङका आधारमा रोवर्ट लेवान्डोस्की वर्षको बेस्ट खेलाडी घोषित भए पनि आयोजकको मूल्यांकनबाट दिने बेस्ट खेलाडीको अवार्डमा फ्रेन्च क्लब पीएसजीका युवा स्टार क्लियन एमबाप्पे ‘बेस्ट प्लेयर अफ् द इयर’ घोषित भए । आयोजकको जज जुरीले एमबाप्पेलाई बेस्ट प्लेयर छान्दा फ्यानले भने लेवान्डोस्कीलाई छाने । दुबईमा आयोजित सभामा लेवान्डोस्की दुईवटा अवार्ड लिन आफैं पुगेका थिए ।
वर्ष २०२१ मा बार्यनका फरवार्डले सानदार प्रदर्शन गर्दै कुल ६९ गोल १२ गोलमा असिस्ट प्रदान गरेका थिए । यता, बालोन डि ओर जितेका पीएसजीका लिओनल मेसीले पनि ग्लोब सकर अवार्डमा कुनै पनि अवार्ड पाएनन् । उनी बेस्ट प्लेयर र टिकटक फ्यान्स अवार्ड दुवैमा मनोनयनमा परेका थिए ।
यस वर्ष सातौं बालोन डी ओर जितेका फ्रेन्च क्लब पीएसजी तथा अर्जेन्टिनाका फरवार्ड लिओनल मेसी र यस वर्ष कुल ६९ गोल गरेका जर्मन क्लब बार्यन म्युनिखका पोलिस फरवार्ड रोवर्ट लेवान्डोस्कीलाई पछि पार्दै पीएसजीका फ्रेन्च स्टार क्लियन एमबाप्पेले ‘दुबई ग्लोब सकर’ अवार्ड जितेका छन् । दुबईमा आयोजित उक्त समारोहमा २२ वर्षका एमबाप्पे ‘मेन्स प्लेयर अफ् द इयर २०२१’ घोषित भएका हुन् ।
दुबई सकर अवार्ड हरेक वर्ष युरोपियन क्लब एसोसिएसनले आयोजना गर्ने गर्छ । जसमा अनलाइन भोटिङ तथा जज भोटिङका आधारमा अन्तिम नतिजा घोषणा गरिन्छ । अन्तिम नतिजा आउँदा पुरुष फुटबलतर्फ एमबाप्पे वर्ष २०२१ को सर्वोत्कृष्ट खेलाडी घोषित भए । यस वर्ष एमबाप्पेले कुल ५१ गोल गरे ।
एमबाप्पेले यस वर्षको बालोन डिओर अवार्ड जितेका आफ्नै क्लब सहकर्मी लिओनल मेसी र बार्यनका पोलिस फरवार्ड लेवान्डोस्कीलाई समेत पछि पार्दै अवार्ड जिते । उनले पहिलोपटक यो अवार्ड जितेका हुन् । यस अवार्डका लागि मेसी, लेवान्डोस्की, क्रिस्टियानो रोनाल्डो, जर्जिन्हो, करिम बेन्जेमा सहितका खेलाडी मनोनयनमा परेका थिए ।
